【Now新聞台】港交所行政總裁陳翊庭接受本台專訪時指，在中美貿易戰下，香港與內地互聯互通顯得更重要。
中美角力持續升溫，陳翊庭表示，本港作為超級聯繫人跟內地金融市場的互聯互通機制，或會發揮更關鍵作用。
陳翊庭說:「互聯互通嘅重要性係愈來愈明顯，至於中美角力會唔會加速呢件事，我最近同投資者溝通，一個我收到比較明顯嘅訊息係，喺有不確定性嘅情況下，當然佢哋要更小心留意，睇一睇佢哋嘅資產配置係咪需要有適度調整，呢個可能都可以畀到我哋一啲機會，可以更好發揮我哋超級聯繫人嘅作用。」
陳翊庭上任逾1年以來，馬不停蹄外訪，單計今年，已3度出訪歐洲，近期亦到過美國，她指出，歐美投資者明顯重拾對中國資產的興趣，並為港股市場帶來機遇。
陳翊庭說:「今年初大家都好清楚知道有一個『DeepSeek Moment』，有一啲好令人振奮嘅公司，喺人工智能(AI)領域冒咗出嚟，我啱啱差唔多嗰段時間喺歐美有一個路演，我同歐美投資者溝通時，我發覺佢哋嘅態度有一個幾明顯嘅轉變，佢哋對中國資產有非常大興趣去研究。」
她續指，外訪期間亦發現有不少外國投資者對互聯互通了解不多，未來會繼續致力在海外進行推廣，並從3方面拓展及改進互聯互通，包括增加參與者、產品及提升基建，其中，人民幣股票交易櫃台納入南向通，可望於短期內成事。
此外，陳翊庭作為港交所首位女行政總裁，一直備受關注，最近更入選《時代》雜誌(TIME)百大人物，這些殊榮對她有何意義？
陳翊庭說:「第一，呢個當然係我嘅榮幸，但對我來講更大嘅意義係，其實佢哋認可嘅唔係我個人，佢哋係認可香港
及香港交易所做緊嘅事，真係代表全球好多朋友都仲係好關注我哋香港。」
她強調，不希望外界太著眼於她的女性身份，因而對她加分或減分，繼推動上市公司董事會不能只有單一性別後，陳翊庭期望藉此鼓勵企業自發推動董事會更多元化。
