【Now新聞台】歐聯第三輪賽事，作客的利物浦憑達雲紐尼斯的入球，1比0擊敗萊比錫，是繼維拉之後，另一支三戰全勝的隊伍。
基拿靴出到禁區頭槌解圍但不夠力度，錫斯高邊線前截到轉身，隨即笠過去，好在掠門而過。
大難不死的利物浦，憑達雲紐尼斯接應沙拿頭槌，衝前撐入，27分鐘領先1比0。紅軍出道的古拿治今場倒戈表現出色，救出達雲紐尼亞斯近門的頭槌。
換邊後，麥卡里士打又射中門楣不入，但利物浦都保住1比0勝局，擊敗萊比錫，開季6場作客全勝，是球會史上第一次。
曼城主場迎戰布拉格斯巴達，開賽3分鐘就由霍頓先開紀錄，半場一球領先。賀蘭換邊後，雜技一樣的後腳埋門，難度和姿勢分都有，彈地令到把關的雲達恩臣相當之難判斷，曼城58分鐘拉開。後上的史東斯接應馬迪奧斯紐尼斯的傳中，頂個拋物線入遠柱，64分鐘為曼城增添紀錄。
4分鐘後，曼城的快速反擊，又是馬迪奧斯紐尼斯的助攻，今次到賀蘭接應射入他今場第二球。領先到四球的曼城，尾段再有馬迪奧斯紐尼斯博到十二碼，親自操刀為曼城「埋齋」，大勝布拉格斯巴達5比0，連續26場歐聯不敗，打破由曼聯保持的歐聯紀錄。
