【Now新聞台】英格蘭超級聯賽，阿士東維拉主場大勝紐卡素4比1。
兩隊都一周雙賽，依然快鬥快。阿士東維拉先起動入第一球，大鐘顯示只是開賽33秒，屈堅斯起腳省中舒亞入網。歐聯八強被巴黎聖日耳門淘汰，專心聯賽爭取來季歐洲賽資格，這次屈堅斯左腳中楣底彈出。
紐卡素周中補賽大炒水晶宮五球，那場頭槌入球，舒亞重溫好夢，間接累球隊落後，但18分鐘扳平，個人歷來英超第18球，成為榜眼級得分後衛，僅次於利物浦雲迪克。
屈堅斯開紀錄後持續運滯，頭槌又中柱，換邊後轉做助攻則很暢通，直線送馬臣一程，64分鐘2比1，維拉搶回領先。
跟著後備發放光芒，藍斯傳中，龍門口兩個人一撞，皮球入網了，是丹般後腳綑到「擺烏龍」。另一後備阿馬度安拿拿禁區外踏順起腳射入，維拉3分鐘內連入兩球拉開。
紐卡素門將樸比33歲正日生日4度失守，慶幸不用第5次。藍斯射中柱，維拉都贏4比1，英超5連勝，兼中止紐卡素的5連勝。
曼城作客贏藍衫愛華頓，靠點運氣再加後勁，達哥夫斯基銅頭一搖中柱，大難不死，後福下半場尾段才降臨，奧懷利楔贏一撞，84分鐘射破僵局，一周前大炒水晶宮收穫英超處子入球，今場20歲29日又有進帳，首次連續兩場英超入球；還有後備哥華傑治，臥著也射入，第199場聯賽上陣，補時兩分鐘鎖定2比0，曼城近5場3勝2和不敗。
