【Now新聞台】英超的利物浦主場反勝熱刺5比1，在積分榜拋離第二位的阿仙奴15分，提早四輪封王，是他們第20次贏得頂級聯賽冠軍。
紅衫利物浦12分鐘失守，被倒戈的蘇蘭基接應角球頂入，熱刺今季頭15分鐘入14球冠絕英超。
紅軍要用入球贖回冠軍夢，路爾斯迪亞斯剷入，旁證最初舉旗，但有半自動越位系統，結果一目了然，助攻的蘇保斯拿爾無越位，利物浦用4分鐘追和。用多8分鐘反超前，麥卡里士打穿雲箭，紅軍輪迴24分鐘，歡度晏菲路眾生。加保不願做男配角，10分鐘後乘巧射遠柱，榮耀歸於上帝，利物浦半場反先3比1。
數糊人人有份，最佳射手沙拿換邊後建功，與KOP看台玩自拍，63分鐘已四球大步走。熱刺後防比城寨更亂，面對紅軍圍城，烏度治被逼「擺烏龍」，和局也足夠的利物浦最終大勝5比1，取得82分提早四輪封王。
五年前疫情球季空場捧盃，五年後利迷全面進場見證紅軍第20次頂級聯賽登頂。雲迪克這程車不再獨行，曾經最佳男主角、前領隊高普爸爸離去，史洛接手第一季平步青雲，成為紅軍最佳導演。
