【Now Sports】曼聯在英超戰線又輸一仗，主場以0:2不敵韋斯咸。
周日曼聯主場對韋斯咸的英超比賽，曼聯今戰派出般奴費蘭迪斯、曼治、烏加迪等一眾正選，4分鐘阿麥迪亞路右路傳中，般奴禁區頂第一時間抽射炒高；8分鐘阿麥迪亞路右路接應長傳後抽射，被門將撲出。韋斯咸站穩陣腳後取回攻勢，26分鐘即取得入球，古度斯左路突破成功，擺脫阿麥迪亞路出波，蘇捷近門撞射破網，韋斯咸領先1:0，領先後2分鐘客隊再有古度斯遠射但炒高。曼聯受制於周中出戰完歐霸後體能下失勢，落後下未見有大反撲，尾段韋斯咸一次快開界外球機會，蘇捷搶第2點埋門但不中目標，結果韋斯咸上半場領先1:0。
下半場韋斯咸一開波即有機會，古度斯邊路出波，獲特包斯12碼點位置撞射得手，但不中目標。約賀51分鐘傷出，阿摩廉一口氣換入哈利麥佳亞和連迪路夫，不過56分鐘烏加迪中路失波，韋斯咸打快攻，查洛保雲接應雲比沙卡左路出波近射得手，韋斯咸領先至2:0。
曼聯後段再換入加拿曹和杜古，力求收復失地，戰至71分鐘有海倫右路近射被門將阿希奧拿用腳擋出，其後麥佳亞兩次頭槌埋門又無功而還。78分鐘般奴開出左路罰球，連迪路夫以及海倫執雞都被阿希奧拿撲出，最終韋斯咸作客2:0贏波，聯賽排名超前曼聯。
