【Now新聞台】截至早上11時止，1小時內《彭博》用戶關注度上升最多港股，依次為港交所、聯想集團、紫金礦業、康方生物、泡泡瑪特。
關稅問題日日新，聯想集團大跌後，今日(14日)股價有明顯修補裂口嘅跡象出現，今早高開逾8%，之後一度高見8.84元，但同其他手機設備股一樣，中午前彈幅都要「縮水」約一半，反彈力度似乎比預期弱，係唔係反映市場仍然有戒心？美國日前宣布暫緩推行對等關稅(Reciprocal Tariffs)90日，市場係咪可以憧憬聯想繼續彈高？彈到咩位要走？
富昌證券聯席董事譚朗蔚指，關稅嘅正負面消息看似可以帶動股價上落，但其實關稅問題短期內唔會向好，美國未曾放鬆，中方亦態度強硬，因此消息暫時只會係負面，即使聯想今日股價一度上到8.84元高位，亦唔代表真正脫險，技術上約8.8元係重要位置，以現時情況睇，股價好難喺呢個位企得穩。
Stevan又提醒，依家市況波動，唔建議隨便撈底，否則「手尾長」。
